Rules and regulations

ৰূপালীম একাঙ্কিকা নাট প্ৰতিযোগিতা

::নিয়মাৱলী::

১) প্ৰতিযোগিতাত মঞ্চস্থ কৰিব খোজা নাট সমূহ মৌলিক ৰচনা হ’ব লাগিব। ৰূপান্তৰিত অথবা অনুবাদ নাটকো মঞ্চস্থ কৰিব পাৰিব কিন্তু এইক্ষেত্ৰত মূল কাহিনীকাৰ/নাট্যকাৰৰ ৰূপান্তৰকৰণ অথবা অনুবাদৰ বাবে প্ৰদান কৰা অনুমতি পত্ৰৰ প্ৰতিলিপি সংলগ্ন কৰিব লাগিব।
২) প্ৰতিযোগিতাত মঞ্চস্থ কৰিব খোজা নাটসমূহৰ গ্ৰন্থ স্বত্ব (কপিৰাইট) সম্পৰ্কীয় আৰু নাট্যকাৰৰ অনুমতি লোৱা ইত্যাদি সমস্ত বিষয়ৰ দায়িত্ব প্ৰতিযোগী দল সমূহে পালন কৰিব লাগিব। নাটকৰ পাণ্ডুলিপিৰ সৈতে নাট্যকাৰৰ স্বাক্ষৰিত অনুমতি পত্ৰৰ প্ৰতিলিপি সংলগ্ন কৰি জমা দিয়াটো বাধ্যতামূলক। গ্ৰন্থ স্বত্ব (কপিৰাইট) অথবা নাট্যকাৰৰ স্বাক্ষৰিত অনুমতি পত্ৰ আদিৰ বিষয়ত উদ্ভৱ হ’ব পৰা যিকোনো পৰিস্থিতিৰ কাৰণে প্ৰতিযোগিতাৰ আয়োজক সমিতি কোনো প্ৰকাৰেই জগৰীয়া নহ’ব।
৩) প্ৰতিযোগিতাৰ দিন বাৰ ঘোষণা হোৱাৰ পিছত পাণ্ডুলিপি জমা দিয়াৰ নিৰ্দ্দিষ্ট তাৰিখৰ ভিতৰত ডিটিপি কৰা পাণ্ডুলিপি পিডিএফ্ ফাইল কৰি rupalim.org@gmail.com লৈ ইমেইল যোগে অথবা +91 97062 63192 / +91 91 01 301929 নম্বৰলৈ হোৱাটচ্ এপ্ যোগে প্ৰেৰণ কৰিব লাগিব।
৪) পাণ্ডুলিপিৰ বেটুপাতত নাট্য দলৰ নাম, নাটকৰ নাম, নাট্যকাৰৰ নাম, পৰিচালকৰ নাম, যোগাযোগৰ বাবে ই- মেইল আৰু হোৱাটচ্ এপ্ নম্বৰ স্পষ্টকৈ উল্লেখ থাকিব লাগিব।
৫) নিৰ্ধাৰিত সময়ৰ ভিতৰত জমা হোৱা নাটকৰ পাণ্ডুলিপি সমূহ প্ৰতিযোগিতাৰ ‘পাণ্ডুলিপি পৰীক্ষণ উপ সমিতি’ৰ দ্বাৰা পৰীক্ষা কৰোৱা হ’ব আৰু যথাৰীতিৰে গ্ৰহণযোগ্য বিবেচিত হ’লে প্ৰতিযোগিতাত অন্তৰ্ভুক্ত হ’ব। এই বিষয়ত সমিতিৰ সিদ্ধান্ত চূড়ান্ত বুলি বিবেচিত হ’ব। কোনো ধৰণৰ বাদানুবাদ অথবা ওজৰ আপত্তি গ্ৰহণযোগ্য নহ’ব।
৬) প্ৰতিযোগিতাত অন্তৰ্ভুক্ত নোহোৱা বা বাতিল হোৱা নাটকৰ পাণ্ডুলিপি ওভতাই দিয়াৰ কোনো ব্যৱস্থা নাথাকিব।
৭) প্ৰতি বছৰে প্ৰতিযোগিতাৰ পূৰ্বে কৰা ঘোষণা অনুসৰি প্ৰতিযোগিতাখন পৰিচালিত হ’ব।
৮) পাণ্ডুলিপি পৰীক্ষণ উপ সমিতিৰ দ্বাৰা প্ৰতিযোগিতাত অংশগ্ৰহণৰ বাবে নিৰ্বাচিত নাটক সমূহৰ এখন প্ৰাথমিক সূচী প্ৰকাশ কৰা হ’ব; য’ত কোনটো নাট্যদলে কোন দিনা নাট পৰিবেশন কৰিব সেয়া উল্লেখ থাকিব। এই ক্ষেত্ৰত আয়োজক সমিতিৰ সিদ্ধান্ত চূড়ান্ত হ’ব।
৯) প্ৰকাশিত সূচী অনুসৰি নিৰ্দিষ্ট দিনত নাট্য দল সমূহে প্ৰতিযোগিতা আৰম্ভ হোৱাৰ অতি কমেও দুই ঘন্টাৰ আগেয়ে পোৱাকৈ প্ৰতিযোগিতা থলীৰ কাৰ্যালয়ত উপস্থিত হৈ নিৰ্ধাৰিত ভৰ্তি মাছুল জমা কৰি পঞ্জীয়ন কৰিব লাগিব।
১০) নাট্যদল সমূহে তেওঁলোকৰ নাটকৰ পাণ্ডুলিপিৰ তিনিটাকৈ প্ৰতিলিপিৰ সৈতে নাট্যকাৰ, পৰিচালক, কুশীলৱ সহিতে সমগ্ৰ নাট্য দলটোৰ সদস্য সকলৰ নামৰ এখন তালিকা মোবাইল/হোৱাটচ্ এপ্ নম্বৰ সহ পঞ্জীয়নৰ সময়ত প্ৰতিযোগিতা থলীৰ কাৰ্যালয়ত জমা দিব লাগিব।
১১) পূৰ্বে প্ৰকাশিত সূচী অনুসৰি নিৰ্দিষ্ট দিনৰ প্ৰতিযোগিতাৰ নাটক মঞ্চায়নৰ ধাৰাবাহিক ক্ৰম নাট্যদল সমূহৰ উপস্থিতিত অনুষ্ঠিতব্য ল’টাৰীৰ যোগে নিৰূপণ কৰা হ’ব। উক্ত সময়ত অনুপস্থিত নাট্যদলৰ ক্ৰম অৱধাৰিত ভাবে শেষলৈ হ’ব। এইক্ষেত্ৰত কোনো ধৰণৰ আপত্তি গ্ৰহণযোগ্য বিবেচিত নহ’ব।
১২) প্ৰতিযোগিতাৰ কাৰণে নাট সমূহ অসমীয়া ভাষাত ৰচিত হ’ব লাগিব। অৱশ্যে নাটকীয় প্ৰয়োজনত কোনো চৰিত্ৰৰ মুখত আন কোনো ভাষাৰ প্ৰয়োগত বাধা নাই। কিন্তু অসংসদীয়, অশ্লীল তথা অমাৰ্জিত আৰু সামাজিকভাৱে বৰ্জিত ভাষা কোনো কাৰণতে প্ৰয়োগ কৰিব নোৱাৰিব।
১৩) প্ৰতিযোগিতাৰ নাটক সমূহৰ বিষয়বস্তু আৰু ৰচনা, ভাষা তথা প্ৰকাশভঙ্গীয়ে কোনো কাৰণতে ৰাষ্ট্ৰ তথা দেশৰ সংবিধান, ধৰ্ম, জাতীয়তা, মানৱীয়তা, ভাৰতীয় সনাতন সংস্কৃতি তথা প্ৰমূল্য আৰু পৰম্পৰাক আঘাত কৰিব নোৱাৰিব। কোনো কাৰণতে যিকোনো জাতি-উপজাতি, সম্প্ৰদায়, ধৰ্মীয় তথা সামাজিক ৰীতি-নীতি, আচাৰ-ব্যৱহাৰ, লোক কলা-সংস্কৃতি, বিশ্বাস তথা লোক পৰম্পৰা অথবা ঐতিহ্য আদিক আক্ৰমণ নতুবা অপমান, অৱহেলা, তিৰস্কাৰ আদি কৰিব নোৱাৰিব।
১৪) প্ৰতিযোগিতাত অংশগ্ৰহণ কৰা নাটসমূহ মঞ্চায়নৰ সময় সৰ্বনিম্ন ৩০ মিনিটৰ পৰা সৰ্বাধিক ৪৫ মিনিটৰ ভিতৰত হ’ব লাগিব। নাট্যদল সমূহে এই নিৰ্ধাৰিত সময়ৰ ভিতৰতে দৃশ্য সজ্জা, দৃশ্য পৰিৱৰ্তন, মঞ্চ সজ্জা আদি সাজু কৰি ল’ব লাগিব।
১৫) নাট মঞ্চস্থ কৰাৰ ক্ষেত্ৰত একাঙ্কিকা নাটকৰ সকলো বৈশিষ্ট্য অটুট থাকিব লাগিব।
১৬) নাটকৰ মুঠ চৰিত্ৰৰ সংখ্যা কমেও দুই আৰু সৰ্বাধিক সাত গৰাকীৰ ভিতৰত হ’ব লাগিব। কাৰিকৰী শিল্পী সহ নাট্যদলটোৰ সৰ্বমুঠ সদস্যৰ সংখ্যা দহ গৰাকীৰ অধিক হ’ব নোৱাৰিব।
১৭) নাটকত এক বা একাধিক শিশু অথবা চেমনীয়া শিল্পীৰ চৰিত্ৰ থাকিলেও সম্পূৰ্ণকৈ শিশু নাট গ্ৰহণযোগ্য নহ’ব।
১৮) নাটকৰ পুৰুষৰ চৰিত্ৰ সমূহত পুৰুষে আৰু স্ত্ৰী চৰিত্ৰ সমূহত মহিলা অভিনয় শিল্পীয়ে অভিনয় কৰিব লাগিব।
১৯) যিকোনো নাট্য দলক ৰূপালীমৰ মঞ্চত কোনো এটা বৰ্ষত এবাৰ মঞ্চস্থ কৰি যোৱা নাটক পুনৰ মঞ্চস্থ কৰিবলৈ অনুমতি দিয়া নহ’ব।
২০) এজন নাট্যকাৰৰ এখন নাটক এটা বৰ্ষত যিকোনো এটা নাট্য দলেহে মঞ্চস্থ কৰিব পাৰিব। এটা বৰ্ষত এগৰাকী নাট্যকাৰৰ নাটক একেলগে একাধিক নাট্য দলে পৰিবেশন কৰিবলৈ বিচৰাৰ ক্ষেত্ৰত যিহেতু এটা নাট্য দলেহে সুযোগ লাভ কৰিব সেয়েহে নাট্যকাৰ গৰাকীৰ অনুমতি তথা অনুমোদন এই ক্ষেত্ৰত গ্ৰহণযোগ্য বিবেচিত হ’ব; যে তেখেতে কোনটো নাট্য দলৰ দ্বাৰা প্ৰতিযোগিতাখনত তেখেতে ৰচনা কৰা নাটক খন মঞ্চস্থ হোৱাটো বিছাৰে।
২১) প্ৰতিযোগিতাৰ বঁটা সমূহ প্ৰতিযোগিতাৰ শেষৰ দিনা বিচাৰক মণ্ডলীয়ে সিদ্ধান্ত দিয়াৰ পিছত সেইদিনাই বিচাৰক, দৰ্শক আৰু নাট্য দলৰ উপস্থিতিত আনুষ্ঠানিক ভাৱে ঘোষণা তথা প্ৰদান কৰা হ’ব।
২২) বঁটা প্ৰদানৰ ক্ষেত্ৰত বিচাৰকৰ সিদ্ধান্তই চূড়ান্ত সিদ্ধান্ত হ’ব। এই ক্ষেত্ৰত যিকোনো পৰিস্থিতিতে কোনো ধৰণৰ আপত্তি অথবা বাদানুবাদ গ্ৰাহ্য বিবেচিত নহ’ব।
২৩) শ্ৰেষ্ঠ নাট্যকাৰৰ বঁটা মৌলিক নাটকৰ পাণ্ডুলিপিৰ মাজতে সীমাবদ্ধ থাকিব। ৰূপান্তৰিত অথবা অনুবাদ নাটকৰ ক্ষেত্ৰত কোনো কাৰণতে শ্ৰেষ্ঠ নাট্যকাৰৰ বঁটা বিবেচিত নহ’ব।
২৪) কোনো এটা শিতানত বঁটা দিয়া বা নিদিয়াটো অথবা কোনোবা এটা শিতানত একাধিক বঁটা প্ৰদান কৰাটো সম্পূৰ্ণ ৰূপে বিচাৰকৰ সিদ্ধান্তৰ ওপৰত নিৰ্ভৰশীল থাকিব।
২৫) নাট্য দলৰ যাতায়ত অথবা থকা-খোৱাৰ ব্যৱস্থাৰ বাবে আয়োজক সমিতি কোনো প্ৰকাৰেই দায়বদ্ধ নাথাকিব।
২৬) নাটকৰ মঞ্চায়নৰ বাবে প্ৰয়োজনীয় সকলো ধৰণৰ দৃশ্য সজ্জা, সাজ সজ্জা, ৰূপ সজ্জা, পোহৰ, সংগীত আদিৰ ব্যৱস্থা নাট্য দল সমূহৰ নিজস্ব হ’ব।
২৭) মঞ্চত থকা সাধাৰণ আলোক সজ্জা তথা শব্দ ব্যৱস্থা নাট্য দল সমূহে ব্যৱহাৰ কৰিব পাৰিব।
২৮) কোনো আপত্তিজনক কথা থাকিলে নতুবা আশানুৰূপ মান বিশিষ্ট বিবেচিত নহ’লে আয়োজক সমিতি তথা বিচাৰক মণ্ডলীয়ে যিকোনো পৰ্যায়ত যিকোনো নাট্য দলক নাটক মঞ্চস্থ কৰিবলৈ নিদিব পাৰে। এই ক্ষেত্ৰত কোনো ধৰণৰ বিষোদগাৰ অথবা অসন্তুষ্টি নৰজিব।
২৯) প্ৰতিযোগিতা পৰিচালনা সম্পৰ্কে প্ৰতিযোগী নাট্য দল সমূহে যদিহে কোনো অসুবিধাৰ সন্মুখীন হয় অথবা তেওঁলোকৰ কিবা আবেদন থাকে তেন্তে প্ৰতিযোগিতা আৰম্ভ হোৱাৰ দুঘণ্টাৰ পূৰ্বে কাৰ্যালয়ত জনাব পাৰিব। নিকট সময়ত জনোৱা যিকোনো অসুবিধা অথবা আবেদন গ্ৰহণ তথা মীমাংসা কৰাৰ ক্ষেত্ৰত আয়োজক সমিতি দায়বদ্ধ নহ’ব।
৩০) পৰিৱৰ্তিত পৰিস্থিতি আৰু প্ৰয়োজন সাপেক্ষে আয়োজক সমিতিৰ সিদ্ধান্ত মৰ্মে প্ৰতিযোগিতাৰ নিয়মাৱলীৰ সংশোধন হ’ব পাৰে। যিকোনো সময়তে হ’ব পৰা সম্ভাব্য সংশোধনীৰ ক্ষেত্ৰত কোনো ধৰণৰ কৈফিয়ৎ দিবলৈ আয়োজক সমিতি বাধ্য নাথাকিব।
৩১) প্ৰতিযোগিতা সম্পৰ্কীয় যিকোনো আপত্তি অথবা অনাহূত বিবাদ পাৰস্পাৰিক বুজাবুজি তথা সহযোগিতাৰ মাধ্যমেৰে মীমাংসাৰ প্ৰচেষ্টাক প্ৰাথমিক অগ্ৰাধিকাৰ প্ৰদান কৰা হ’ব। অন্যথা যিকোনো অমীমাংসিত বিষয় গুৱাহাটী উচ্চ ন্যায়ালয়ৰ অধীনস্থ হ’ব।।